Книгата „Македонски писмовници (епистолари) од 16 и од 19 век“ од д-р Михајло Георгиевски е објавена во издание на „Македоника литера“ од Скопје. Со транслитериран текст и истовремено во факсимили во книгата се објавени четири стари македонски писмовници: Слепченскиот, кој потекнува од 16 век, писмовниците на Христе Хаџи Константинович од Прилеп, Арсениј Поп Стефанович и на проигуменот Леонтиј Хиландарски – трите од 19 век.
Писмовниците претставуваат книги – зборници со обрасци за пишување писма по разни поводи, создадени од црковни или световни лица. Познати се и под името епистолари. Епистоларната литература има долга и стара традиција. Таа се зародува во Византија, а од таму се проширува и во словенските земји.
Засега како најстар и најзначаен македонски писмовник е Слепчен¬скиот писмовник од средината на 16 век. Тој е напишан во Слепченскиот манастир – Демирхисарско, а се чува во Државната библиотека во Москва.
Во Република Македонија денес се чуваат три писмовници од 19 век, и тоа: Писмовникот на Христе Хаџи Константинович учител прилепски од град Прилеп Македонија од 1824 година, Писмовникот на Арсениј Поп Стефанович од 1844 година и Писмовникот на проигуменот Леонтиј Хиландарски од почетокот на 19 век.
Михајло Георгиевски има објавено околу триста научни и стручни трудови од областа на културната историја на Македонија.
Негови поважни објавени монографски трудови се: Македонска печатарска дејност (1972), Манастирските библиотеки и читалишта во Македонија (1975), Македонското книжевно наследство од 11 до 18 век (1983), Каталог на старопечатени и ретки книги во НУБ „Св. Климент Охридски“ (1983), Библиотекарството во Македонија меѓу двете светски војни (1989), Словенски ракописи во Македонија (шест книги – од кн. III до кн. VIII), Македонски светци (1997), Прилози од старата македонска книжевност и култура (кн. 1 – 1997, кн. 2 – 2009), Општохристијански култни светци во Македонија (2008) и Македонски црковни псалти (2013).
За својата научна дејност е добитник на наградите „Св. Климент Охридски” (2001) и на „23 Октомври” (2009).