Комисијата за труд и социјална политика денеска ги даде на натамошно читање дополнувањето на Законот за вработување на инвалидни лица и Предлог – законот за национална база на податоци на лица со инвалидност, по скратена постапка.
Заменик – министерот за труд Ибрахим Ибраими појасни дека основна цел на Предлог – Законот за дополнување на Законот за вработување на инвалидни лица е да се овозможи Посебниот фонд да се користат средства за придонес за пензиско и инвалидско осигурување, придонес за здравствено осигурување и придонес за вработување за вработеното инвалидно лице, како и придонес за пензиско и инвалидско осигурување за вработените во заштитното друштво кои не се инвалидни лица и инвалиди на трудот.
Со Предлог-законот за национална база на податоци на лица со инвалидност, по скратена постапка, се предвидува воспоставување единствена електронска евиденција, односно национална база за лица со инвалидност. Се уредува и начинот на функционирање на националната база на податоци за лица со инвалидност, обработката на податоците во базата, користењето на податоците во базата, безбедноста на податоците и надзорот над функционирање на базата.
Националната база на податоци за лица со инвалидност претставува дел од интегрираниот здравствен информатички систем кој овозможува обработка и давање на користење податоци меѓу надлежните органи, со цел воспоставување на единствена евиденција на податоците и остварување на правата по основ на инвалидност согласно закон.
Со овој закон е уредена и можноста за ажурирање и давање на користење на податоците во Националната база од страна на надлежните органи за обработка и давање на користење на податоците од Базата.
Законите се на дневен ред на продолжението на 59.седница закажано за среда.