Излезе од печат новото дело на новинарот Менде Младеновски „Во прво лице“, петта книга со идентичен наслов во рамки на едицијата „Поводи и погледи“ на издавачот „Битолски весник“.
Во најновата книга поместени се четириесеттина колумни кои новинарот Младеновски ги објави во редовната рубрика на „Битолски весник“, „Поводи“, во текот на изминатата година.
– Книгата е печатена во тираж од 300 примероци и најголем дел од тиражот ќе биде подарен на вечерашната промоција која ќе се одржи во културниот центар „Магаза“. Во книгата се поместени колумни, мои видувања и анализи за актуелни национални, регионални, но и локални теми, кои го предизвикаа вниманието на јавноста. Верувам дека и најновото издание на „Во прво лице“ ќе најде свое место во домашната библиотека, истакна Младеновски во пресрет на вечерашниот промотивен настан.
Рецензент на книгата е литературниот критичар и писател Љубомир Груевски, кој воедно ќе ја промовира книгата „Во прво лице“ на новинарот Менде Младеновски.