Маж, кој признал дека е поврзан со глобалната терористичка организација Ал Каеда, сакал да активира бомба од 450 килограми пред зградата на американската централна банка во Њујорк, јави агенцијата „Франс прес“.
21-годишниот маж, роден во Бангладеш, е уапсен пред зградата на американската централна банка додека безуспешно се обидувал да активира бомба, соопшти њујоршката полиција.
Зградата пред која уапсениот Квази Мохамад Резванул Ахсан Нафис сакал да ја активира бомбата е во близина на местото каде се извишуваа кулите близначки на Светскиот трговски центар, во јужен Менхетен, кои беа урнати во терористичките напади со грабнати авиони зад кои стоеше Ал Каеда.
Главниот обвинител на Бруклин додаде дека момчето влегло во САД во јануари годинава за да изведе атентат. Повикувајќи се на поврзаност со Ал Каеда во странство, тој сакал да формира терористичка ќелија на американска територија.
Едно од лицата што ги врбувал, бил прикриен агент на ФБИ, и според обвинителот, му помогнал во подготовката и го снабдил со лажен експлозив, внимавајќи да не бидат доведени во опасност граѓаните.