Со стендап комедијата на Никола Тодороски синоќа заврши вториот Меѓународен фестивал на комедијата „Гола месечина“, што го организираа општина Аеродром, Театар комедија и Министерството за култура.
Жирито во состав Лилјана Мазова, претседател и Катерина Коцевска и Бојан Трифуновски, членови, одлучи наградата за најдобра машка улога да му ја додели на Рубенс Муратовски за улогата Мартин во претставата „Чолак“, во режија на Синиша Евтимов, во продукција на Драмски театар.
Наградата за најдобра режија ја доби Адмир Гламочак за претставата „Дамите бираат“ од Ентони Мекартен и Стефан Синклер, во продукција на Алттеатар Сараево.
Со Гран при е наградена претставата „Дамите бираат“ од Ентони Мекартен и Стефан Синклер, во продукција на Алттеатар Сараево.
Жирито годинава одлучи да не ја додели наградата за најдобра женска улога.
Наградите синоќа ги додели градоначалникот на општина Аеродром Ивица Коневски. Според него, оправдани се заложбите на општина Аеродром да го збогати културниот живот на граѓаните и фестивалот да прерасне во традиција.
За време на фестивалот публиката погледна осум претстави од Македонија и странство. Годинава фестивалот го посетија повеќе од 10 илјади граѓани.