Во осумгодишното владеење градоначалникот на општина Охрид не може да се запамети по ниту еден капитален објект изграден за Охриѓани, обвини денеска ВМРО-ДПМНЕ.
Партискиот портпарол Александар Бичиклиски на денешната прес-конференција посочи дека граѓаните на Охрид ќе го паметат градоначалникот Александар Петрески по штетното и недомаќинско работење, блокираните општински сметки, небулозните идеи како што е наплата на такса за луѓето кои не се од Охрид.
„Осум години граѓаните ги замајува со административни процедури и празни ветувања дека се работи и се во постапка ветените проекти. Но, на терен ништо од ова не е реализирано“, рече Бичиклиски.
Тој потсети на ветувањата на Петрески за изградба на нов пазар и нова автобуска станица, за решавање на сообраќајниот хаос со изградба на катни гаражи, пензионерски дом, аква парк, голф терени, како и жичарница на Галичица, но оти ништо не е реализирано.