Националната галерија на Македонија (НГМ) вечер во објект Мала станица ќе го отвори осмиот Младински пролетен салон на тема „Минијатура“, кој ќе претстави различни дела: цртеж, слика, графика, скулптура, колаж, видео, фотографија, компјутерска графика и дела во комбинирана техника – сите изработени во мал формат.
– Изработката на едно ликовно дело е сложен творечки процес, и без разлика дали се работи за огромна површина на ѕид или платна, или сосема мало уметничко парче, потребно е да се вложат исклучителни напори и креативност во процесот. Проблемот на обработка е перспективата, мотивот, композицијата, симетријата, рамнотежата, единството, кои се присутни и на мал простор, соопшти НГМ.
Изложбата ја организира дидактичко-едукативниот сектор во Националната галерија на Македонија, а селектор на салонот е Ацо Таневски, ликовен едукатор во НГМ.