Денеска со почеток во 18 и 30 часот ќе започне протестен марш за оставка на Владата на ВМРО-ДПМНЕ и ДУИ.
Маршот ќе се одвива по следната маршута: Камп на слободата пред Влада, Илинденска (Министерство за одбрана), Рузвелтова (Агенција за млади и спорт), Партизанска (библиотека „Браќа Миладиновци“), Климент Охридски, Камп на слободата пред Влада.
„Ние, граѓаните, на 3 јуни 2015 година, среда, во 18.30 часот, масовно ќе го изразиме својот револт од актуелната власт и ќе бараме оставка од владата на ВМРО-ДПМНЕ и ДУИ.
Граѓанскиот протестен марш ќе започне од кампот на Слободата пред Влада и ќе продолжи низ улиците на Скопје.
Ги повикуваме сите граѓани да излезат на протест. Ова е борба меѓу граѓаните и врхушката на Груевски и Ахмети. Ова е борба за враќање на општеството и државата во рацете на граѓаните на Македонија!
Затоа, ајде, сите заедно уште еднаш громогласно и едногласно да побараме оставка од Владата и формирање преодна влада која ќе обезбеди фер и демократски избори“.
По завршувањето на маршот ќе започне дискусија на тема „Централизирана децентрализација – Во секој проблем се крие можност” во која ќе учествуваат Дејан Павлески – Претседател на Комисија за локална самоуправа на СДСМ, Зоран Дамјановски – градоначалник на Куманово, Јане Вртески – поранешен градоначалник, Љупчо Кец Мицковски – поранешен градоначалник.