Во Друштвото на писателите на Македонија денеска ќе се одржи книжевен портрет на писателот Атанас Чупоски и промоција на книгата поезија „Der Wanderer“.
За поетското, прозното и филмолошкото творештво на Чупоски ќе зборуваат Лидија Капушевска-Дракулевска, Владимир Мартиновски и Илинденка Петрушева.
Во рецензијата за „Der Wanderer“ Капушевска-Дракулевска посочува дека авторот скита низ жанровски хибридни песни: хит-сингли, патописни песни, елегии, псалми, сновиденија и дијалози. Лиричноста е клучната доминанта во овие стихови, како и музикалноста, на која Чупоски инсистира како на негово поетско кредо уште во својата книга-првенец.
Атанас Чупоски (1969) е писател и синеаст, компаратист и филмолог, магистер на филолошки науки. Ги објавил книгите: „Концерт на труба во дур“ „Христијанските слики и симболи и нарацијата во филмовите на А. А. Тарковски“ и „Старинарница Балкан“. Објавил стотина студии, есеи, песни, раскази и публицистички текстови.