Овде сме бидејќи водиме војна со оваа власт за правда и слобода, за подобар живот, порача вечерва Дамјан Манчевски, потпретседателот на СДСМ, во антвладниот камп.
-Тоа што го кажуваме на разговорите во Брисел, го кажуваме и овде на отворена сцена пред својот народ. Тоа е едно, бараме оставка од целата влада, оставка од јавниот обвинител Марко Зврлевски, оставка од Јован Илиевски, оставки од сите поради кои немаме демократија и слобода, бараме попис, средување на избирачкиот список и спроведување на избирачкото законодавство, истакна Манчевски.
Тој рече дека не може и нема да има отстапки за овие барања кои ги обединија граѓаните на Македонија.
– Прашање е на денови кога ќе се сруши оваа власт. Се наоѓаме во ситуација како во 1991 година кога излегувавме од еднопартискиот систем и влегувавме во повеќепартиски систем – треба да направиме нова држава, праведна, во која ќе има пари за патишта, а не за барокни згради. Македонија на граѓаните и за граѓаните , рече Манчевски.