Групата штрајкувачи, поранешни политички затвореници во Албанија на 22-от ден од нивниот протест прогласија „штрајк со смрт” откажувајќи се и од консумирањето вода и пијалаци, откако двајца веќе претходно се самозапалија.
Крајно екстремниот чекор на кој се одлучија поранешните политички затвореници во Албанија е поради одбивањето на тамошните власти да започнат преговори за решавањето на проблемот и исплатата на материјалната отштета за секој минат ден во затворите на поранешниот албански комунистички систем на Енвер Хоџа.
По самозапалувањето на двајца штрајкувачи, коишто поради тешки повреди се префрлени на лекување во соседните Грција и Италија, со финансиски средства на албански бизнисмени блиски на опозицијата, во петокот навечер е регистриран уште еден обид од поддржувач на протестот да се самозапали.
Вкупно 19 поранешни политички затвореници во системот на Енвер Хоџа штрајкуваат со глад барајќи владата на Сали Бериша да им го исплати целосно штетите за изминатите години во затвор.
Власта, меѓутоа, преку претставник на министерството за финансии минатата седмица изјави дека сите политички затвореници од комунистичкиот режим ја добиле првата рата од обештетувањето, а некои и втората рата од отштетата, оценувајќи го штрајкот со глад како политички.