Режисерот и продуцент Светозар Ристовски од продуцентската куќа Small Moves Films годинава е избран за македонски претставник на Producers on the Move, иницијатива на European Film Promotion, која од 15-ти до 18 мај се одржува по 16-ти пат во склоп на Канскиот филмски фестивал.
– Програмата се одржува на годишно ниво и претставува збирно место на 20 најнадежни продуценти од ширум Европа кои добиваат можност да остварат контакти со филмски професионалци и потенцијална копродукциска соработка на актуелните проекти. Четиридневниот настан на продуцентите им овозможува поголема експонираност и видливост и претставува простор за промоција и развој на европски филмски копродукции преку работилници, индивидуални состаноци, предавања и пичинг сесии каде имаат можност да ги презентираат своите тековни и идни проекти пред своите колеги од индустријата, ссопшти Агенцијата за филм на Република Македонија.
Светозар Ристовски е копродуцент на најновото остварување на Огњен Свиличиќ, „Такви се правилата”, кој премиерно беше прикажан во програмата „Хоризонти“ на минатогодишното издание на Венецискиот филмски фестивал.
Покрај копродукцијата со Свиличиќ, Ристовски е продуцент, режисер и сценарист на долгометражниот проект „Лазар”, копродукција меѓу Македонија, Бугарија, Хрватска и Франција, кој е во фаза на постпродукција и чија премиера се очекува летово, наведува Агенцијата за филм.