Екипите на Голден Стејт и на Чикаго постигнаа победи по продолженија на ноќешните дуели од плеј офот во НБА лигата, а доминацијата на гостите ја комплетираше и Кливленд со нов триумф. По овие дуели овие три екипи имаат предност од 3-0 во добиени натпревари и се наоѓаат на една победа од пласман во конференциското полуфинале.
Голден Стејт уште еднаш благодарение на Стефен Кари стигна до победата. Бекот на Голден Стејт најпрвин постигна тројка за изедначување во регулраниот дел 108:108, а натпреварот го заврши со 40 поени. Голден Стејт славеше по продолжение со 123:109. Триумф по две продолженија постигна и Чикаго на гости кај Милвоки 113:106, откако беше нерешено 95:95 (регуларен дел) и 101:101(прво продолжение). Дерик Роуз со 34 поени беше најзаслужниот за победата на „биковите“. Кливленд се радуваше на победа на теренот на Бостон со 103:95, а Леброн Џејмс постигна 31 поен и 11 скокови.
Вечерва се играат дуелите: Далас – Хјустон (0-2 во победи), Вашингтон – Торонто (2-0) и Сан Антонио – ЛА Клиперс (1-1).