Во организација на Спортскиот центар „Форца“ од 15 мај до 30 јуни ќе се одржи спортската манифестација „Месец на спорт“ наменета за компаниите кои сакаат да го покажат спортскиот дух на своите вработени.
Традиционално, по осми пат, компаниите ќе се натпреваруваат во осум спортски дисциплини, а оваа година продолжува соработката со Спортскиот центар „Борис Трајковски“.
Директор на Спортскиот центар „Форца“ и Директор на „Месец на Спорт” Димитар Делевски на денешната прес-конференција информира дека пријавувањето на учесниците е почнато и дека очекува во осумте дисциплини 888 натпреварувачи.
– Екипите од денеска може да се пријавуваат, а интересен е податокот дека оваа година е 8-то издание на „Месец на спорт”, на кое ќе се одржат многу натпревари, во 8 спортски дисциплини, на кои очекуваме да се натпреваруваат 888 натпреварувачи. Фудбал, баскет, одбојка, куглање, пинг-понг, тим билдинг, картинг и пливање се категориите во кои екипите може да се пријавуваат. СЦ „Форца“ и СЦ „Борис Трајковски“ се местата каде што ќе се случуваат натпреварите и каде што екипите ќе ги мерат квалитетите во областа на спортот, изјави Делевски.
Претставникот од СЦ „Борис Трајковски“ Младен Ѓуровски рече дека овој настан ќе ги обедини компаниите и бизнис единките преку рекреативното спортување, а при тоа учесниците ќе можат да освојат и награди.
– „Месец на спортот” е едномесечен спортски турнир за бизнис единките во Македонија, наменет за развој на рекреативниот спорт и Team Building помеѓу вработените. Сигурен сум дека ова ќе биде и дополнителна забава за сите пријавени затоа што на овој начин можат да се дружат, рекреираат, забавуваат, спортуваат, но и натпреваруваат. Најдобрите нека победат, потенцира Ѓуроски.