Во киното „Фросина“ денеска ќе се одржи вториот видео фестивал за планинско трчање „Луѓе како нас“ на кој ќе бидат презентирани 12 филма посветени на овој вид трчање.
Фестивалот е можност сите заинтересирани да последат кратки или нешто подолги филмови кои се однесуваат на трчањето во природа пред се по неасфалтирани патеки, мали шумски и планински патеки, дури и на терен без патеки.
Покрај презентацијата на филмовите, во рамки на фестивалот ќе се одржи и дебата на вечерта на тема „Каде се движи планинското трчање?” на која ќе учествува ултрамаратонката од Србија, Тања Стојановски.
Фестивалот го организира „ЕХО – фестивал за планински филм“, ПСД Макпетрол и организацијата за промоција на планинското трчање ТРЕКС со поддршка на Алгасан.
Организаторите посочуваат дека во последните години овој тип на спорт и рекреација добива огромен број на приврзаници од повеќе причини пред се поради почистиот воздух, директниот контакт со природата, соочувањето со себе и со своите стравови и граници и нивно пробивање и надминување, како и поради дружењето и меѓусебното помагање. Растојанијата што се трчаат може да бидат од неколку километри до неколку стотици километри, а на оние места каде што е премногу стрмно, не се трча туку се оди, но генерално секој се труди да трча што е можно поголем дел од патеката.