Напредокот за наоѓање решение за грчкиот финансиски проблем не задоволува, предупреди денеска Европската комисија, на само една недела пред министрите за финансии од еврозоната да го разгледаат ова прашање на средбата во Рига.
– Продолжуваме да работиме со другите институции и грчките власти. Преговорите се во тек. Но, досега не сме задоволни од постигнатото ниво на прогрес, изјави портпаролот на Еврокомиисјата, Маргаритас Схинас.
Според него, работата треба да се интензивира пред неофицијалната средба на еврогрупата на 24 април.
Грција и нејзините кредитори се стремат да постигнат договор за нови реформи, кои се неопходни за деблокирање на 7,2 милијарди евра, од последната транша од финансиската помош. Постои опасност Атина наскоро да остане без финансиски средства, па затоа Еврогрупата треба да одобри отпуштање на дополнителна финансиска поддршка.
Се очекува грчкиот проблем да биде тема на разговор и на пролетните средби на Меѓународниот монетарен фонд и на Светската банка, кои почнуваат денеска.