Од јануари, Скопје ќе добие вртелешка која ќе биде поставена пред зградата на МЕПСО на плоштадот Македонија, а ќе чини 160.000 евра, пишува дневниот весник Вест.
Според информациите на весникот, фирмата Технометал Вардар со која ЈП Паркови и Зеленило склучиле договор, вртелешката треба да ја донесе од Италија, а дотогаш треба да биде направена платформата на која таа ќе стои.
„Платформата и покривот ќе бидат со дијаметар од 9 метри, бидејќи каруселот е со дијаметар од 7 метри. Цената на картата сеуште не е одредена, тоа ќе го договориме откако каруселот ќе пристигне во земјава“ – велат од Паркови и Зеленило за Вест.
Весникот пишува дека вртелешката ќе има декоративен венец, дрвена ротирачка платформа и најмалку 32 седишта, а фигурите ќе бидат пони коњчиња, кочии и ротирачки чаши. Вредноста на проектот ќе изнесува 160.000 евра а ќе се финансира од буџетот на Град Скопје.
