Во Косово има најголем број неписмени граѓани споредбено со останатите балкански држави. Околу 55.000 косовски граѓани се целосно неписмени, односно не знаат ниту да пишуваат, ниту да читаат, додека вкупно 82.188 лица се функционални аналфабети, односно знаат да пишуваат и да читаат, но не се во состојба да го разберат тоа што го пишуваат, покажуваат податоците на Агенцијата за статистика на Косово.
Експертите од областа на образованието тврдат дека бројот на оние кои се целосно неписмени бележи намалување споредено со претходните податоци. Во 1981 година, во Косово, 17,6 отсто од популацијата биле неписмени, додека во годините по војната таа стапка се намалила на околу шест отсто.
– Врз основа на претходните податоци, од вкупната популација целосно неписмени биле околу шест отсто. Во последните податоци, таа стапка е помала за два отсто – вели Халим Хисени од Центарот за образование на Косово.
Сепак, Хисени смета дека состојбата е загрижувачка, бидејќи доколку процентот се спореди со другите земји во регионот и во Европа, произлегува дека Косово е на прво место во Европа според стапката на неписмени.