На улица „Македонија“ утринава се изврши сеча на две повеќедецениски дрвја со богати крошни. Стеблата се наоѓаа пред кафеаната „Пелистер“, непосредно до плоштад „Македонија“. Позади нив, пак, деновиве се врши ископување каде што најверојано ќе се пресели споменикот на Цар Самоил, според неофицијални информации.
Од Град Скопје велат дека дрвјата се исечени затоа што биле стари и заболени, но пред само една сезона тие имаа богати и зелени крошни. Позади искасапените дрвја, пак, дупката ја копаат работници на фирмата „Трансмет“ која го изедува реновирањето на плоштадот. Се наметнува заклучок дека дрвјата се исечени за да го отворат видикот кон новата местоположба на споменикот на Цар Самоил.
„A1ON“ чека одговор од Град Скопје дали споменикот навистина ќе се дислоцира неколку метри поназад и зошто се врши преместување.
Утринава од градските служби веќе им одговорија на граѓани кои реагираа на сечата. Од твитер профилот на Градот рекоа:
„Станува збор за сечење на 2 костени, бидејќи стеблата биле заболени и во фаза на сушење“, одговорија од таму.
Неодамна снимени фотографии, пак, покажуваат дека стеблата воопшто не биле во фаза на сушење. Еден твитер корисник на шега предлага на нивно место да се постави нов споменик, но изгледа шегата не е далеку од вистината.
„И мене лично ми сметаа дрвата. Дали може да никне уште еден споменик, на општо народна радост?“
Маја Васева