Турскиот претседател Реџеп Таип Ердоган изјави дека притисокот на Ерменците врз Турција за масакрот врз нивниот народ од пред еден век да се признае за геноцид, не претставува трагање за вистината туку обид да се постигнат поени против неговата земја.
Тој наведе дека Ерменија одбила повеќе турски покани да се вклучи во истражување со кое би се утврдило што точно се случило.
Историчарите проценуваат дека околу 1,5 милиони Ерменци настрадале за време на Отоманското царство во периодот на Првата светска војна. Научниците тоа го оценуваат како прв геноцид во 20 век.
Турција одбива да го користи терминот геноцид и тврди дека бројот на настраданите е многу помал, како и оти настрадале луѓе од двете страни.
– Нивната цел не е да трагаат за вистината, туку да ја напаѓаат Турција и да и наштетат, наведе Ердоган.
Во Ерменија стогодишнината од масакрот ќе биде одбележана на 24 април.