Романскиот министер за финансии Дариус Волков ќе продолжи да игра клучна улога во владините економски планови и покрај тоа што е под корупциска истрага, изјави премиерот Виктор Понта. Тоа е прва реакција на Понта откако финансиска полиција почна синоќа истрага против Волков.
Тој е обвинет дека обезбедил победа на компанија во државен тендер во замена за поткуп од два милиона евра додека бил градоначалник на јужниот град Слатина.
– Најважниот проект на Владата во 2015 година е Даночниот кодекс во кој Дариус имаше и ќе продолжи да има клучна улога. Сакам да Ве уверам сите дека тој проект ќе продолжи по секоја цена и во секој политички контекст кој е поврзан со равојот на државата, наведе Понта на својот Фејсбук профил.
Од коментарите не е јасно дали Волков ќе остане на функцијата како министер за финансии, наведуваат локални медиуми. Понта и Волков најавија планови за намалување на сите даноци меѓу 2016 и 2019 година што според аналитичари ќе предизвика голема дупка во буџетот.