Колумбиските власти соопштија дека заплениле товарен брод што пловел под кинеско знаме, откако на него е откриено големо количество оружје.
Бродот е натоварен во Куба, а запленувањето било извршено во текот на изминатиот викенд, кај колумбиското пристаниште Картагена,на брегот на Карипското Море.
Полицијата го уапсила капетанот на бродот Ву Хонг затоа што илегално пренесувал оружје,муниција и експлозив.
Во официјалните документи на бродот било запишано дека превезува житарки, но по деталниот претрес полицијата открила 100 тони барут, три милиони парчиња детонатори и околу три илјади топовски гранати.
Директорот на колумбиското државно обвинителство, Луис Гонзалес изјави дека кинескиот капетан ќе биде обвинет за шверц на оружје.
Според обвинителството во Богота, колумбиската полиција го претресувала бродот 48 часа, пред да се даде налог за апсење и затворање на капетанот Ву Хонг.