Српскиот актер Иван Босилчиќ на 7 март во Универзалната сала во Скопје по втор пат ќе одржи музичко-поетска вечер насловена како „Пар стихови за нас“.
По минатогодишниот настап, кој беше исто така организиран во пресрет на Денот на жената, Босилчиќ повторно ќе се претстави пред македонската публика со перформанс во кој ќе се испреплетуваат стиховите и музиката.
– Како по некоја традиција на дамите на 8 Март им го даваме најубавиот подарок, а тоа е Иван Босилчиќ, рече Влатко Плевнеш од музичката куќа „Силва Ва“, која е организатор на настанот.
Босилчиќ нагласи дека му е драго што повторно ќе настапи пред македонската публика.
– Моите колеги ме прашуваат што ќе им е една ваква претстава покрај сите оние во кои што настапувам, но едно е средбата преку екран, а мене ми е потребно да се сретнам лице во лице со народот, рече Босилчиќ.
Тој, како што рече, не сака да настапува во големи сали бидејќи неопходно му е да го види и последниот човек во редот во лице затоа што само така стиховите можат да се кажуваат.
Настапот на Босилчиќ во Универзална сала започнува од 20:30 часот.