Полскиот министер за одбрана Томаш Шемоњак изјави дека Полска нема на Украина да и испорачува смртоносни орудија, но додаде дека Западот не е особено оптимистички настроен за исходот од мировните преговори поради руската „ниска надежност“, пренесоа американските медиуми.
За утре во Минск е предвидена средба на врвот за решавање на украинската криза, на која ќе учествуваат лидерите на Украина, Русија, Германија и Франција.
Шемоњак за полското Радио 1 изјави дека првиот чекор треба да биде прекин на огнот, „а потоа можеме да зборуваме“.
Во интервјуа за неколку полски медиуми Шемоњак информира дека Полска на армијата на соседна Украина и доставила храна, облека и ќебиња во вредност од околу 17 милиони злоти (четири милиони евра) и подготвува нова слична пратка.
Тој ја повтори својата позиција дека нема пречки за трговските оружени зделки.
Шемоњак, меѓутоа, за весникот „Газета виборча“ подвлече дека е исклучено да се достави тешко вооружување и ги отфрли шпекулациите на полските медиуми дека полската Влада може на Украина да и понуди противвоздушни ракети „Гром“ или тенкови Т-72.
– Сакам да е сосема јасно: нема збор дека на Украина ќе и се испорачува тешко вооружување или ракети „Гром“, тенкови или друго слично вооружување. Полска немала и нема вакви планови, рече Шемоњак.