Шведскиот огранок на антиисламското движење Пегида синоќа го одржа првиот протест во градот Малме, на кој учествуваа околу 100 лица.
Според полицијата, на контрапротестите учествувале околу 4.000 луѓе.
Еден од ораторите на митингот на Пегида бил галеристот Хенрик Ронкист, кој минатата година е казнет поради изложба на слики од уметникот Дан Парк. Сликарот беше осуден на шест месеци затвор поради поттикнување расна омраза со потценувачко навредување на Роми и Африканци.
Полицијата постави заштитни огради околу собирот на Пегида, а учесниците фрлале со јајца врз полицајците, но нема повредени.
Контрадемонстрантите скандирале „НЕ на расистите низ нашите улици“, исвиркувајќи ги приврзаниците на Пегида.
Во една од црквите во Малме била одржана и литургија за солидарност со муслиманите во Шведска.