СДСМ бара од Јавното обвинителство веднаш да се изјасни дали е точно тврдењето на провладиниот весник Вечер дека претседателот на СДСМ, Зоран Заев, на тет а тет средбата со премиерот Никола Груевски бил сниман во законска процедура.
„Ако е тоа точно, тоа значи дека претседателот Заев бил под посебни истражни мерки, кога бил сниман во кабинетот на премиерот Груевски.
Ако е така, тоа значи дека извор на незаконски извадените снимки во јавноста се Никола Груевски, Јавното обвинителство или Груевски и обвинителството заедно“, стои во соопштението на СДСМ.
Тоа, велат, е потврда за сторено кривично дело и во тој случај Јавното обвинителство на Република Макеоднија треба да каже зошто не покренува кривична постапка за овој скандал.
„Ако тврдењето на весникот Вечер не е точно, тогаш обвинителот Марко Зврлевски, по допрен глас од јавноста, по службена должност, треба да каже дека провладиниот весник лаже. Зврлевски и Јавното обвинителство имаат обврска да не се кријат и да се изјаснат за веста на весникот под контрола на Груевски, Вечер, што денеска ја пренесуваат и други медиуми“, се вели во соопштението на СДСМ.