Претседателот на Европската комисија, Жан-Клод Јункер денеска уште еднаш ги предупреди граѓаните на Грција, на три дена пред предвремените парламентарни избори во оваа земја-членка на Европската унија, дека кој и да дојде на власт, ќе мора да се придржува до мерките на штедење на „тројка“ што ја сочинуваат Европската комисија, Европската централна банка и Меѓународниот монетарен фонд.
Како што јави дописникот на МИА од Брисел, челникот на ЕК смета дека Грција не ќе може да се реши од обврските кон меѓународните кредитори, кои досега и позајмија околу 380 милијарди евра на земјата за да не доживее економски колапс, и покрај ветувањето на партијата на СИРИЗА дека ќе ги укине ако ја превземе власта.
На прашањето дали во Брисел е тензично поради исчекувањето на изборните резултати и можноста СИРИЗА да дојде на власт во Атина, наследникот на Жозе Мануел Барозо одговори дека „тензиите се секогаш високи во Брисел и тоа го карактеризира овој град“.
– Ние не сакаме да се мешаме во изборната дебата во Грција и Грците сами одлучуваат за својата иднина и кој да ги води. Единствено што можам да кажам е дека обврските превземени од Грција ќе мора да бидат почитувани од секоја идна грчка Влада, дециден е Јункер.
Претседателот на Еврокомисијата не сакаше јавно да коментира и за најавената вечерашна одлука на Еворпската централа банка (ЕЦБ) да испечати 500 милијарди евра со цел да се зголеми потрошувачката и инвестициите во ЕУ со цел да се зголеми економскиот раст.
– ЕЦБ е независна институции и банката ја води монетарната политика на еврозоната, па не би било паметно и интелигентно, ниту корисно, да реагирам на се уште недонесена одлука, посочи Јункер.