Најмалку 5.000 пензионери од март до ноември годинава ќе можат да го искористат правото за бесплатна бањско-климатска рекреација. За таа намена во Буџетот се одвоени 38 милиони денари.
Огласот, како што истакна владиниот портпарол Александар Ѓорѓиев на денешната прес-конференција, ќе биде објавен до крајот на месецов и ќе трае еден месец, период во кој може да аплицираат сите заинтересирани пензионери.
– Своевиден приоритет ќе имаат пензионерите кои во текот на својот работен век работеле во рудници и корисниците на инвалидска пензија со повисок степен на телесно оштетување. Согласно програмата што веќе ја усвои Владата, пензионерите годинава ќе можат шест дена бесплатно да престојуваат во четири бањи – Катланово, Дебар, Гевгелија и Банско крај Струмица на база на полн пансион со три оброка. Покрај тоа, бесплатно ќе можат да ги користат бањите, здравствени прегледи, а бесплатен ќе биде и превозот до бањата и од бањата до местото на живеење, рече Ѓорѓиев.
Во изминатите четири години, нагласи, 27.430 пензионери ја користеле услугата за бесплатно бањско лекување. Услугата позитивно ја оцениле и пензионерите, но и туристичките работници.
– Тоа не мотивира и во идниот период да се спроведува овој проект континуирано, но и да се креираат нови проекти кои ќе водат кон обезбедување нови услуги за оваа категорија граѓани, рече Ѓорѓиев.