Романскиот претседател Клаус Јоханис изјави денеска на седницата на Високиот совет на магистратите дека една од главните цели на судскиот систем треба да биде укинувањето на Механизмот за соработка и проверка, а Романија да биде оценета објективно, како што заслужува.
Јоханис изјави дека осум години по воведувањето на Механизмот за соработка и проверка дошол моментот Романија да биде оценувана објективно онака како што заслужува.
Според него условите кои беа предмет на дискусија при приемот на Романија во Европската унија веќе се исполнети.
– Сметам дека една од главните цели на судскиот систем треба да биде укинување на Механизмот за соработка и проверка, посочи Јоханис и додаде дека за остварувањето на таа цел напори треба да вложат сите институции во судскиот систем, Парламентот и извршната власт.
Новиот романски претседател присустваше денеска на седница на Високиот совет на магистратите, на која се избира новото раководство на институцијата по истекувањето на мандатот на досегашното.