Новиот омбудсман на ЕУ Емили О’Рајли од утре ја презема функцијата, соопшти денеска Администрацијата на европскиот народен правобранител.

Согласно одлуката на Европскиот парламент од јули, О’Рајли ќе го замени Никифорос Диамандурос, кој на оваа европска функција беше над 10 години.

– Расте поделбата во Европа, се намалува довербата на граѓаните во европските институции и многумина мислат дека нивниот глас не се слуша, коментираше О’Рајли, по повод стапувањето на должноста.

Таа ветува дека ќе работи за добивање потранспарентна и поефикасна европска администрација.

Новиот омбудсман изрази намера да соработува со Европарламентот и активно да се ангажира Европската комисија и другите европски институции да ги штитат правата и интересите на граѓаните.

Секоја година омбудсманот на ЕУ добива околу 2.500 жалби од граѓани, фирми, невладини организации, универзитети, општини, по кои отвора над 450 истраги. Повеќето од нив се темелат на жалби од недостиг на транспарентност во работата на европските институции и на одбивања да се даде пристап до документи или до информации. Другиот дел од случаите се поврзани со проблеми со европските програми или проекти, дискриминација и судир на интереси во администрацијата на ЕУ.