Механизмот за соработка и контрола, кој и е наложен на Бугарија во 2007 година од страна на Европската комисија, ќе биде прекинат до 2019 година, изјави денеска претседателот на ЕК, Жан-Клод Јункер на заедничката прес-конференција со бугарскиот премиер Бојко Борисов.
– За време на предизборната кампања ветив дека механизмот за соработка и контрола ќе биде преразгледан во мандатот на оваа комисија. Условите се поставени за тоа да се случи етапно, истакна Јункер.
Претседателот на ЕК нагласи дека „Бугарија е дел од европското семејство и ќе добие поддршка за решавање на актуелните геополитички предизвици. Ќе бидат обновени европските фондови во знак на солидарност, со цел да се искористат на најдобар можен начин за подобрување на животот на Бугарите“.
Според него, прашањата од областа на енергетиката предизвикуваат општа паника меѓу европските граѓани.
– Во врска со гасоводот Јужен поток работиме заедно со Бугарија за решавање на отворените проблеми. Она што е најдобро за Бугарија, е најдобро и за Европа. Со премиерот Борисов ќе најдеме заедничко решение. Јужен поток може да биде изграден, условите се одамна познати. Топката е во полето на Русија, но ние сме подготвени, додаде Јункер.
Тој истакна и дека Бугарија е подготвена за приклучување во Шенген зоната, очекувајќи тоа да се случи многу брзо.