Украинскиот претседател Петро Порошенко денеска изјави дека го номинирал Павло Климкин да остане министер за надворешни работи, а Степан Полторак министер за одбрана на новата Влада.
Двајцата во моментот изрвшуваат министерски функции.
Парламентот треба да се состане подоцна денеска со цел да гласа за предложените кандидати за министерски функции. Премиерот Арсениј Јацењук минатата недела изјави дека ќе ги поддржи избраниците на Порошенко за двете министерства.
Порошенко денеска дал украинско државјанство на тројца странски технократи, предложени за министерски функции во новата Влада.
– Пред Украина се вонредни предизвици, исклучително тешка економска ситуација, руска агресија, неопходност од радикални реформи и борба со корупцијата. Се тоа наметнува иновативни решенија во Владата, изјави Порошенко, додавајќи дека тоа значи барање кандидати за новата влада не само во Украина, туку и во странство, изјави Порошенко.
Тројцата кандидати се Американката Наталија Јареско, Литванецот Ајварас Абромавичус и Грузиецот Александар Квиташвили.
Премиерот Јацењук достави до парламентот список на кандидати, номинирани од владејачката коалиција. Според него Јареско е номинирана за министер за финансии, Абромавичус за министер за економија, а Квиташвили за министер за здравје.