Студентите од Факултетот за информатика при универзитетот „Гоце Делчев“ – Штип денеска ја одбележаа Европската недела на роботиката. По тој повод беше организирана презентација на роботи кои самите студенти и професори ги изработиле.
Според деканот на Факултетот за информатика, Владо Гичев настанот „Сретни ги роботите“ предизвикал голем интерес кај студентите. За студентите, нагласи, е корисно искуство, кое ќе ги мотивира да се запознаат подлабоко со природните науки, технологијата, инженерството и математиката и притоа да развијат одговорен пристап кон употребата на роботите во нашето општество.
Студентите имаа можност да видат роботи како играат фудбал, летаат и како се применуваат во секојдневието и во производството.
Професор Сашо Коцевски вели дека е задоволен што видел жар и љубов кај студентите и професорите за роботиката.
– Ние сакаме да дадеме импулс за понатамошен развој во оваа област и сето тоа сакаме да оди спонтано и природно. Имаме повеќе магистранти, професори и студенти кои работат во овие области. Тие проекти се од широк дијапазон од летечки, мобилни роботи со најразлични операции меѓу нив, вели Коцевски.
Тој додава дека роботиката е интересна и бара знаење, а за да се занимаваш со неа треба да се знае и математиката, физика и основни концепти од електрониката.