Екипите на Град Скопје и на ЈП „Водовод и канализација“ ја реконструираа атмосферската канализациска мрежа на улицата „Павел Шатев“, во близина на подвозникот, со што се зголеми проточноста на атмосферските води.
Во правецот од населбата Пржино кон подвозникот на двете коловозни ленти на крстосницата поставени се три попречни решетки од монолитен бетон со димензија од 300 милиметри, во вкупна должина од 7,35 метри и еден сливник. Тие се приклучени во постојната шахта на постојниот атмосферски колектор со профил од 900 милиметри.
На крстосницата дополнително се поставени три сливници. Два сливника се попречно поставени, еден до друг, на коловозот и тоа на влезот од улицата „Павел Шатев“ кон улицата „Антон Попов“, а еден сливник е поставен на влезот од улицата „Антон Попов“ кон улицата „Павел Шатев“.
Функцијата на решетките и на сливниците е да ги прифатат атмосферските води пред тие да се слеат во најнискиот дел на подвозникот и да го поплават.
