Франција е доволно инвентивна да најде начин да не ги испорача воените бродови „Мистрал“ на Русија, и да најде нивни нови купувачи, изјави украинскиот министер за надворешни работи Павло Климкин.
Несогласувањето на Киев со испораката на два воени брода, договорено меѓу Франција и Русија во 2011 година е сосема јасно, истакна тој.
„Мистрал“ не може и не треба да бидат испорачани на Русија, како од политичка гледна точка, така и според етичкиот кодекс на ЕУ, истакна Климкин, алудирајќи на европските санкции со кои се забранува извоз на оружје за Русија.
– Сметам дека француските власти, со својот секогаш ангажиран и креативен начин, треба да најдат решение „Мистрал“ бродовите да се достават на други, за гарантирање на безбедноста наместо за нејзино поткопување. Сигурен сум дека француските пријатели ќе најдат решение, изјави украинскиот министер.
Двата брода „Мистрал“ беа продадени од Франција на Русија за 1,2 милијарди евра во јуни 2011 година за време на претседателот Никола Саркози.