Стратегијата на Турција за време на нејзиното претседавање со Групата 20 најразвиени држави (Г20) ќе биде насочена кон намалување на нееднакоста меѓу најразвиените и најмалку развиените земји, изјави турскиот премиер Ахмет Давутоглу пред самитот на лидерите на Г-20 овој викенд во австралискиот град Бризбејн.
Давутоглу, кој пристигна во Бризбејн вчера нагласи дека престојното турско претседавање, кое почнува во декември се совпаѓа со исклучително важен период за Г20.
– Турција ќе биде натоварена со тешка задача да го координира имплементирањето на веќе донесените одлуки од земјите од Г20, како и да ги хармонизира тие планови, посочи Давутоглу.
Тој нагласи дека земјата има друга важна улога, односно улогата на координатор на најнеразвиените економии во светот, која и беше доделена во 2010 година со мандат од десет години.
Според Давутоглу тоа на Турција и дава можност да биде „мост меѓу најмалку и најмногу развиените држави“ .