Високиот претставник на ЕУ Федерика Могерини ја разгледува можноста европската Канцеларија за сузбивање на корупцијата ОЛАФ да ги истражи обвинувањата на сметка на Еулекс, соопшти денеска нејзиниот портпарол Маја Коцијанчич.
– Високиот претставник многу внимателно ги следи случувањата во врска со Еулекс и разгледува сите опции, рече Коцијанчич на новинарите во Брисел, одговарајќи на прашањето за барањето на група пратеници на ЕП за тоа ОЛАФ да ја преземе истрагата.
Пратениците на социјалдемократската група во ЕП, како и неколку пратеници на другите партии, побараа по вчерашниот затворен состанок со функционерите на ЕК во Надворешно-политичкиот комитет на ЕП оваа истрага да се провери од независно тело.
Ричард Ховит, главниот претставник на социјалдемократите во Комитетот, го изнесе ставот ОЛАФ да ги истражи не само наводите за корупција во врвот на Еулекс, туку и случајот на суспензија на британската обвинителка Мари Бамие, која за тоа јавно проговори, како и заканите на новинарот на приштинскиот весник „Коха диторе“, кој за тоа пишуваше.
Тој рече дека барањето истрагата да излезе надвор од рамките на Еулекс утрово и го пренел на Могерини и предупреди дека одбивањето да се постапи по него би го загрозил кредибилитетот на Еулекс и на ЕК.