Во Собранието на Република Македонија денеска седници ќе одржат комисиите за финансирање и буџет, за економски прашања, за надворешна политика, за транспорт и врски, Законодавно-правната комисија и Комисијата за еднакви можности на жените и мажите.
Комисијата за финансирање и буџет ќе расправа по Предлог законот за дополнување на Законот за преземање на акционерски друштва во прво читање.
Предлог законот за дополнуање на Законот за приватизација на државниот капитал и Предлог законот за изменување и дополнување на Законот за угостителска дејност се точки по кои ќе дебатира Комисијата за економски прашања.
Пред Комисијата за надворешна политика новоименуваниот амбасадор на РМ во Киев, Столе Змејкоски ќе ја претстави својата платформа за дипломатски активности во Украина. Комисијата ќе се произнесе и по повеќе предлог-закони за ратификација на спогодби и договори на РМ со други земји.
Комисијата за транспорт и врски ќе расправа за измените и дополнувањата на законите за внатрешната пловидба, за јавните патишта, за превоз во патниот сообраќај, за превоз на опасни материи во патниот и железничкиот сообраќај, како и за Законот за сигурност во железничкиот систем, сите во прво читање.
Предлог-законот за изменување и дополнување на Законот за еднакви можности на жените и мажите во прво читање е единствена точка на дневниот ред на Комисијата за еднакви можности на жените и мажите.
За сите предлог – закони кои ќе бидат на дневен ред на горе-наведените собраниски комисии денеска треба да се изјасни и Законодавно-правната комисија.