Австрија е една од водечките инвеститори во Македонија. Приливот на директни инвестиции од Австрија во Македонија изнесува 484,3 милиони евра за периодот од 1997 до 2013 година, истакна министерот за економија Беким Незири на денешната конференција „Австриско-македонски денови“.
Конференцијата, според Незири, треба да ги поттикне уште повеќе австриските инвестиции во Македонија бидејќи ваквите дискусии се одлична можност за продлабочување на економската соработка меѓу двете држави.
Тој посебно ја потенцираше можноста за инвестирање во технолошко- индустриските развојни зони кои нудат големи поволности за инвеститорите како што се даночните олеснувања.
– Убеден сум дека заеднички можеме уште повеќе да придонесеме за остварување на нашите цели – вие од аспект на деловните успеси, а ние од аспект на економски просперитет на Република Македонија, преку нејзино интегрирање во европската и светската економија, истакна Незири.
Почесниот претседател на Европскиот форум ALPBAH, Ерхард Бусек во своето обраќање нагласи дека Европската унија се наоѓа на критична точка од развојот, но оти мора да продолжи со процесот на проширување, затоа што тоа е поврзано и со зајакнување на стабилноста на регионот на Југоисточна Европа.