Ви ги презентираме резултатите од последните анализи на Институтот за јавно здравје на РМ, за квалитетот на водата за пиење во Гевгелија кои покажуваат НЕ ДОЗВОЛЕНО присуство на отровниот елемент арсен со концентрација од 12,2 микрограма на еден литар вода (дозволена граница од СЗО е 10 микрограми на литар), велат од здружението Арсена.
Не ја знаеме причината на варирањата, но отровот е меѓу нас и редовно се испорачува, како „чист“ производ низ градскиот водовод на Гевгелија, иако во себе содржи опасен и отровен металоид кој е причинител на голем број заболувања, пред се’ сите видови неоплазми, стерилитет, спонтани абортуси и други пореметувања.
Наместо трајно решение градоначалникот Иван Франгов изјави дека се исклучени спорните бунари (3 и 4 од ревирот кај Моин) и заедно со првите два (бунарите 1 и 2 кај Моин ) се меша со бунарските води од Вардар.
Ако е така, од каде тогаш повторно недозволена концентрација на арсен од 12,2 микрограми, која според оценката на ИЈЗ од 23.09.2014 година, со документ број 6604/2014 „ НЕ ОДГОВАРА на Правилникот за безбедност на вода – Сл. Весник на РМ бр. 46/2008“.
Очигледно е дека ваквиот Џејми Оливер рецепт, мешање на бунарските води како салата, не е успешен во случајот со гевгелиското водоснабдување.
Граѓаните и АРСЕНА бараат трајно решение, а дотогаш Советот на општина Гевгелија да ги прифати иницијативите за намалување на цената на водата на гевгелискиот водовод и субвенционирање на трошоците за набавка на пакувана вода до секое семејство кое е приклучено на градскиот водовод во Гевгелија.
Се надеваме дека ќе одвоите простор за нашето соопштение со кое ја актуелизираме проблематиката со арсенот присутна веќе две години, а за која властите УПОРНО МОЛЧАТ.