„Сакаме да ја споделиме со вас и со вработените во образованието следнава информација, што сметаме дека е важна за состојбата во којашто се наоѓа образованиот систем.
Ова е реакција на преку ноќ донесените измени во законите за основно и средно образование во Собранието на РМ, како стил на работење на ВМРО-ДПМНЕ“, изјави на денешната прес-конференција Петар Атанасов, претседател на Комисија за образование и наука и член на ИО на СДСМ.
„Комисијата за образование и наука на СДСМ подготви официјална претставка до Меѓународната организација на трудот, во Женева, во врска со прекршувањето на одредбите на Конвенциите 87 и 98 за слободата на здружување и колективно договарање.
Овие конвенции Република Македонија ги ратификуваше уште во 1991 година.
Претставката до Меѓународната организација на трудот се однесува на измените во Законите за основно и за средно образование со коишто власта предвиде замена на наставниците кои штрајкуваат со други наставници, што е спротивно на Уставот и законите.
СДСМ како левичарска партија и натаму ќе ги поддржува сите барања за унапредување на правата на работниците, условите за работа и статусот на вработените во државниот сектор.
СДСМ остро се спротивставува на какви било обиди за изигрување на правото на штрајк на вработените во образованието, како и политички игри и злоупотреби на ова право“, рече Петар Атанасов.