Кинематографот Крис Менџис денеска пристигна во Битола каде што ќе му биде врачена наградата за животно дело „Златна камера 300“.
Британецот во Битола дојде со неговата сопруга Џудит Ан Менџис и до среда ќе биде специјален гостин на Интернационалниот филмски фестивал „Браќа Манаки“.
Во вторник во малата сала на Центарот за култура, Менџис ќе одржи и мастер час.
Покрај него, во Битола се очекува да пристигнат и оскаровката Жулиет Бинош и кинематографот Лука Бигаци. Французинката во Битола пристигнува од Торонто, а Бигаци доаѓа директно од Лондон.
ИФФК „Браќа Манаки“-Битола почнува утревечер и првпат годинава ќе бидат поставени три црвени теписи, за тројцата оскаровци Бинош, Менџис и Бигаци.
Фестивалот се одржува под покровителство на претседателот Ѓорге Иванов.