Рускиот претседател Владимир Путин изјави дека денеска со неговиот укрински колега Петро Порошенко разговарале телефонски и утврдиле план за решавање на ситуацијата во Украина.
– Планот се состои од седум точки, истакна Путин за време на својата посета на Монголија.
Рускиот претседател увери дека е на многу блиски позиции со Порошенко за тоа како да се реши конфликтот во Украина.
– Со цел да прекинат крвопролевањата и стабилизирање на ситуацијата во југоисточниот дел на Украина, сметам дека двете страни треба итно да се согласат и координирано да ги спроведат идните дејствија, потенцира Путин.
Тој додаде дека украинските власти и проруските сили во источниот дел на земјата можат до петок да постигнат конечен договор по ова прашање, во рамки на Контакт групата.
Путин ја повика украинската армија да ја прекине операцијата против сепаратистите, а бунтовниците да го запрат своето насилство во областите Доњецк и Луганск. Меѓу другите чекори за решавање на конфликтот се размена на заробеници, воспоставување хуманитарен коридор за бегалците и испорака на хуманитарна помош.
– Една од предложените мерки предвидува целосна и објективна меѓународна контрола за почитување на условите за прекин на огнот и мониторинг на ситуацијата во безбедносната зона, која ќе биде создадена, нагласи шефот на руската држава.