Лидерот на австриските конзервативци Михаел Шпинделегер, утринава поднесе оставка на сите функици во Владата на одгласите за остри кавги во неговата Австриска народна партија.
-Од сите барам лојалност и сплотеност, а за таа цел и од партнерите во Владата, рече Шпинделегер на прес конференција, на која се откажа од функциите министер за финансии и вицеканцелар.
Неговата оставка го означува почетокот на несигурниот период за големата, традиционална австриска коалиција, која од декември 2013 година е управувана од канцеларот Вернер Фајман од Австриската социјалдемократска партија.
Двете главни партии имаат разлики за прашањето дали е неопходна фискална реформа. Австриската социјалдемократска партија со години наназад инсистира на воведување данок врз богатството, потег што конзервативците редовно го одбиваат.
Лидерот на Австриската народна партија беше жестоко критикуван во сопствената партија од три регионални влади (на провинциите Тирол, Горна Австрија и Форарлберг), кои го обвинија дека води престрога политика на штедење.
-Оние кои велат дека сега треба фискална реформа, тоа можат да го направат единствено преку задолжување, рече Шпинделегер.
Австрискиот долг изнесува 79 проценти од бруто домашниот производ. Коалицијата сака до 2018 година да го намали до 71,5 проценти.