Постапката за отпис на долгови на најранливите категории граѓани се очекува да заврши до октомври, а се проценува дека ќе се опфатат меѓу 50.000 и 100.000 граѓани, што, пак, зависи од тоа колку ќе се пријават
Компаниите кои сакаат да учествуваат во владината мерка за отпис на долговите на ранливите категории може да се пријават до денеска. Покрај ЕВН Македонија, Комерцијална и Тутунска банка, и Стопанска банка а.д. Скопје се пријави да учествува на повикот на Владата за отпис на долговите.
Одлуката, како што соопшти банката, ја донесе Надзорниот одбор на седница одржана на 30 јули годинава.
Целата постапка за отпис на долгови на најранливите категории граѓани се очекува да заврши до октомври, а се проценува дека ќе се опфатат меѓу 50.000 и 100.000 граѓани, што, пак, зависи од тоа колку ќе се пријават.
За отпис на долговите граѓаните ќе треба да поднесат барања во центрите за социјална работа во местото на живеење во рок од 30 дена од објавувањето на повикот од страна на Министерството за финансии. За прифаќање на барањето ќе одлучува посебна комисија формирана од министерот за труд и социјална политика.
Се предвидува да се отпишуваат долгови настанати заклучно со 31 декември 2013 година, а по основ на потрошена електрична енергија, топлинска енергија, за кредитни картички, пречекорувања на трансакциски сметки и потрошувачки кредити класифицирани во категорија Г и Д од страна на банките, кои не се обезбедени, како и за радиодифузна такса.
Инаку, со оваа мерка заедно со главниот долг предвидено е да се отпишат и каматите, како и трошоците за нотари и извршители, а за отпишаниот долг доверителите, односно банките, ЕВН, Топлификација ќе добијат право на даночен кредит во висина на одреден процент на долгот, кој нема да биде повеќе од 10 отсто од отпишаниот долг.
Мерката предвидува да се отпишуваат долговите на три најранливи категории граѓани, односно корисниците на социјална помош и постојана парична помош, невработени лица кои активно бараат работа подолго од 12 месеци и лицата кои се изложени на социјален ризик поради смрт на брачен другар или инвалидност или потешка болест настанати во последните пет години.
Услов за првите две категории за да ја користат оваа мерка е да немаат остварено дополнителни приходи поголеми од 105.600 денари во 2013 година и да не поседуваат друг имот освен станот или куќата во која живеат.