Министерството за одбрана на Полска денеска соопшти дека заради вооружениот конфликт во соседна Украина ја забрзува процедурата за купување нови борбени хеликоптери, пренесоа американските медиуми.
Портпаролот на министерството Јацек Сонта информира дека е поместен на напред крајниот рок за разгледување на понудите за испорака на 30 нови летала, што ќе ги заменат застарените руски „Ми-24“.
Меѓу десетте модели напаѓачки хеликоптери, што и се понудени на Полска, се наоѓаат „Апачи Еј Ејч-64 И“ на американската компанија „Боинг“, „Јурокоптер Тајгер“ на француско-германскиот конзорциум и британско-италијанските „Агуста Еј Дабл Ју 129“.
Полковникот Сонта забележа дека министерството „со загриженост го следи развојот на настаните во источна Украина“.