Шеесет и пет годишниот жител на гостиварско Чегране, Џ.Р., бил застрелан во нога, откако кон него пукал неговиот роднина и сосед И.Р (57).
Според СВР Тетово, на пукањето му претходела бурна расправија на двајцата роднини околу градежни активности на просторот помеѓу нивните куќи. Кавгата, во еден момент излегла од контрола и кулминирала.
Постариот од братучедите, од испуканиот проектил задобил влезна рана во левата надколеница и бил пренесен во гостиварската болница, каде му е извршена хируршка интервенција и е пуштен на домашно лекување.
И.Р. по пријавата, е приведен и задржан во Полициската станица Гостивар.
Јавен обвинител и екипа од Полициската станица Гостивар извршиле комплетен увид, пронајден е пиштолот „Застава“ со непознат калибар од кој се претпоставува дека е пукано и даден е на вештачење.
По расветлување на деталите, од СВР Тетово најавуваат дека против И.Р. ќе следува соодветна пријава, со која ќе биде изведен пред судија во претходна постапка на Основниот суд Гостивар.