Нов скејт-парк, направен според сите европски стандарди, е отворен на Кејот на реката Вардар во Скопје. Скејт паркот е целосно финансиран од буџетот на Град Скопје и неговата вредност е околу 200.000 евра. Скејт-паркови се предвидени во Програмата на Владата и во Програмата на Агенцијата за млади и спорт и треба да се направат и во Охрид, Битола, и во други градови.
– Пред околу две години, некаде во 2012 година на Ден на идеи пристигна една личност која што даде идеја за изградба на еден ваков скејт-парк и образложи зошто е сето тоа потребно, дека многу луѓе го користат и дека во Република Македонија нема соодветен согласно стандарди и димензии кои се меѓународно утврдени. Се обратив до градоначалникот на Град Скопје, Коце Трајановски, до Агенцијата за спорт и млади и еве проектот е реализиран, истакна премиерот Никола Груевски, кој присуствуваше на отворањето на скејт паркот.
Градоначалникот Трајановски рече дека димензиите на скејт-паркот се 15 метри во ширина и 50 метри во должина.
– Во тој простор има девет справи, ограден е со ограда која е на задоволителна висина. Има осветлување кое овозможува паркот да се користи и во ноќните часови. Задоволството кај младите е огромно, за оние кои сакаат малку адреналински спортови. Овој скејт-парк е во Изборната програма за 2014 година. Онака како што ветивме и како што планиравме тоа го остваруваме. Скејт-паркот е правен заедно со професионалци кои користат скејт-паркови и нивните сознанија, контакти и нивната умешност придонесува тој да биде направен и на нивно задоволство, посочи Трајановски.
Со ова на младите од Скопје и од другите градови, како што рече, ќе им се овозможи што повеќе да вежбаат, се усовршуваат и се разонодуваат за да може да учествуваат и на натпревари надвор од Македонија.
– Во вечерните часови и во текот на денот тука ќе има инструктори кои ќе се грижат за скејт-паркот и ќе им даваат совети на оние кои почнуваат со овие активности. Скејт-паркот овозможува три вида забава-со ролерки, скејтборди и со ГМХ велосипеди. Оваа локација сметам дека е една од најсоодветните во Скопје за ваков вид забава, додаде Трајановски.