Собранието на Република Македонија денеска ги верификуваше мандатите на девет нови пратеници кои дојдоа на местата на министрите и на премиерот и на оние кои поднесоа оставки.
Нови пратеници се Андон Чибишев, Светлана Јакимовска, Марија Ангелова, Ѓорѓи Коџобашиев, Благородна Бојаџиева, Алил Ибраими, Драган Данев и Јасмина Дамчевска.
Констатирана беше и оставката на функцијата пратеник која вчера ја поднела Шкодране Дарлишта од листата на ДУИ.
Пратениците ја изгласаа потребата за донесување по скратена постаока на предлог измените и дополнувањата на Законот за аудио и аудиовизуелни медиумски услуги.
Министерот за информатичко општество и администрација Иво Ивановски образложи дека со измените се ослободуваат од плаќање радиодифузна такса корисници на социјална и постојана парична помош. Исто така, рече Ивановски, со инструментална музика се проширува опсегот на домашна музика за националните телевизиии.
На деневен ред на оваа седма седница на Собранието се и утврдувањето двајца потпретседатели на Собранието, членови на Националниот совет за евроинтеграции, предлог одлуката за испраќање припадници на Армијата на Република Македонија за учество во мировната операција, ИСАФ во Авганистан, за предлог на кандидати за членови на Советот на Агенцијата за аудио и аудиовизуелни медиумски услуги, како и Предлог на законот за изменување и дополнување на Законот за аудио и аудиовизуелни медиумски услуги, по скратена постапка.
Пратениците треба да разгледаат и повеќе годишни извештаи за 2013 година и тоа за работата на Народниот правобранител за степенот на обезбедувањето, почитување, унапредување и заштита на човековите слободи и права во 2013 година, на Судскиот совет на Република Македонија, на Советот на јавните обвинители на Република Македонија, на Агенцијата за администрација, на Дирекцијата за заштита на личните податоци, на Државната комисија за одлучување во управна постапка и постапка од работен однос во втор степен, на Комисија за заштита на правото за слободен пристап до информациите од јавен карактер, на Државната комисија за жалби по јавни набавки на Комисијата за заштита на конкуренцијата, на Советот за радиодифузија на Република Македонија, на Агенцијата за електронски комуникации, на ЈРП Македонска радио телевизија, на Агенцијата за пошти, на Комисијата за хартии од вредност и на Државната комисија за спречување на корупцијата.