Црногорската Влада планира до септември да побара статус држава набљудувач во рамки на Арапската лига за да засили контакти со држави од арапскиот свет и со цел привлекување инвестиции.
Директни контакти и подобра соработка со државите од арапскиот свет се главни причини што Црна Гора во септември ќе побара статуст набљудувач во рамки на Арапската лига.
– Со членство можеме да направиме непосреден увид во тоа што работи Арапската лига, во политиката што ја водат, а која може да биде важна за нашата дипломатија. Исто така се отвораат и учества на наши високи официјални лица на состаноци на Арапската лига каде може да се остварат билатерални контакти, вели Павле Каранкиќ од МНР на Црна Гора.
Соработката на Црна Гора и арапските држави е интензивирана во изминатите години. Податоците укажуваат дека од 2007 до 2013 во Црна Гора има околу 80 милиони арапски инвестиции. Во рамки на Арапската лига има 22 исламски држави и четири држави-набљудувачи – Бразил, Еритреја, Венецуела и Индија.